बझाङ, माघ १५
बझाङको जयपृथ्वी नगरपालिका–७ सुवेडास्थित सुनिपिपलचौर माध्यमिक विद्यालयले एसईई तयारी गरिरहेका विद्यार्थीहरूको शैक्षिक स्तर सुधार गर्न बुधबार (भोली) देखि विद्यालयमै निःशुल्क ट्युसन कक्षा सञ्चालन गर्ने भएको छ । आर्थिक रूपमा कमजोर विद्यार्थीलाई लक्षित गरी सञ्चालन गरिएको यो कार्यक्रमले विद्यार्थीहरूको शैक्षिक स्तर सुधार गर्न र उनीहरूको तयारीलाई अझ प्रभावकारी बनाउने अपेक्षा गरिएको छ । ट्युसन कक्षामा विषय शिक्षकहरूबाट गणित, विज्ञान र अंग्रेजी विषयको ट्युसन पढाई हुने विध्यालयले जनाएको छ ।
विद्यालय व्यवस्थापन समितिका अध्यक्ष धिरेन्द्र बहादुर सिंहले यो कदमलाई विद्यार्थीको भविष्य निर्माणमा एक महत्वपूर्ण प्रयासका रूपमा व्याख्या गरेका छन् । ‘विद्यार्थीलाई बाहिरी ट्युसनको आर्थिक बोझ कम गर्दै उनीहरूको अध्ययनलाई प्रभावकारी बनाउने हाम्रो मुख्य उद्देश्य हो । यसमा अभिभावक र विद्यार्थीहरूको सहयोग देख्दा हामी निकै हर्षित छौँ ।’ उनले भने । विद्यार्थीहरू यो कक्षाबाट निकै लाभान्वित हुने अध्यक्ष सिंहले अपेक्षा गरेका छन् ।
एसईईको तयारी गरिरहेका छात्र प्रकाश जोशीले भने, ‘विद्यालयमै निःशुल्क ट्युसन हुँदा हामीजस्ता आर्थिक रूपमा कमजोर विद्यार्थीलाई धेरै सहज हुनेभएको छ । नत्र हिडेर सदरमुकाम चैनपुर जानुपथ्र्यो । विद्यालयमै निःशुल्क ट्युसन हुँदा घरमै खाना खाएर पढ्न पाइने भएको छ । यसमा हामी खुसी छौ । यसले हामीलाई थप मेहनत गर्न प्रेरित गरेको छ ।’
यसैगरी, अभिभावकहरूले विद्यालयको यो प्रयासलाई अत्यन्त सराहनीय मानेका छन् । स्थानीय अभिभावक सत्यराज काेइरालाले भने, ‘विद्यालयले यस्तो कार्यक्रम सुरु गरेर हाम्रो छोराछोरीको शैक्षिक स्तर सुधार्न ठूलो योगदान दिएको छ । बाहिर ट्युसन पठाउन नसक्ने अभिभावकहरूका लागि यो निकै राहतको कुरा हो ।’
शिक्षकहरूले विद्यार्थीलाई एसईई परीक्षाको तयारीमा सहजीकरण गर्न कक्षालाई व्यवस्थित र परिणाममुखी बनाएका छन् । शिक्षक खत्रीले भने,‘विद्यार्थीहरूको आवश्यकता र कठिनाइलाई ध्यानमा राखेर पाठ्यक्रम तयार गरेका छौँ । उनीहरूको आत्मविश्वास र क्षमता अभिवृद्धिका लागि हामी सक्दो प्रयास गरिरहेका छौँ ।’ निःशुल्क ट्युसन कक्षाको यो पहलले विद्यार्थी, अभिभावक र शिक्षकमाझ सकारात्मक प्रभाव पारेको छ । यो कार्यक्रमले विद्यार्थीको शैक्षिक प्रगतिमा सहयोग पु¥याउने अपेक्षा गरिएको छ । यो कार्यक्रम अन्य विद्यालयहरूका लागि पनि प्रेरणाको स्रोत बन्ने विश्वास गरिएको छ ।